நீயின்றி நானில்லை

இந்த ஆறு மாத
வாழ்க்கையில்
என்னை நீ புரிந்து
கொண்டது எவ்வளவு?
என்றாய்..
அதை எண்ணிப்பார்க்கத்
தெரியவில்லை எனக்கு - உன்னைப்
பிரித்து புரிவது எதற்கு?
என் உடலில்
உயிராய் நீ இருக்கையில்...

எனக்குள் நீ

நீ என்னிடம்
பேசுகிற தோரணையிலேயே
உன் உணர்வுகளை
என் உடலிலும்
மனதிலும் இறக்கிவிட்டுவிடுகிறாய்...
என்ன மாயமோ?

தவிப்பு

இன்று உன்னிடம் பேசும்வரை
பேச மாட்டேனா என்று தவித்தேன்...
பேசிய பிறகோ மீண்டும் பேச
நாளை வரை காத்திருக்க
வேண்டுமே என்று துடிக்கிறேன்...

காதல்

உன் வீட்டுக் கணினியில்
இணையத்தளம் வருமெனக்
கேட்டதிலிருந்து உன்
குறுஞ் செய்தி வாராதா?
என ஏங்கிக் கொண்டிருக்கிருக்கிறேன்
உன் இரவில் நீ தூங்கிக்கொண்டிருப்பாய்
என்பது கூட நினைவில் இல்லாமல்...

இந்திய மனம்

எல்லாமே மலிவாய்க்
கிடைக்கிறது - டாலரில்!
எகிறுகிறது இதயம்
எண்ணிப் பார்க்கையில் - ரூபாயில்!

தாய்மை

பெண்ணின் தாய்மைக்கு
பிள்ளை சுமப்பதே - சுகம்
ஆணின் தாய்மைக்கு - தன்
பிள்ளையின் நினைவே சுகம்....

விலகி இருத்தலின் வலி

விடிகின்ற பொழுதில் - என்
விழிகள் தேடும் உன்
உருவம்
விழுந்த பொழுதில் - என்
உடல் நாடும்
உன் வெம்மை
சில மணித்துளிகள் கழிந்த
பிறகே தெரியும்
நம் இருவருக்கும்
இடையில் எவ்வளவு
தொலைவு எனும் உண்மை...!