வாசகன்

ஒரு புதிய
புத்தகத்தை தீண்டும்
வாசகனாகிறேன் – நான்
உன்னை எண்ணிய
கணங்களிலெல்லாம்…

பூ மாரி

பூ மாரி பொழியுது
என்பார்கள் எங்கள் ஊரில்
புரியவில்லை எனக்கு - அது
அப்போது!
புரிந்து கொண்டேன்
எதிர்காற்றில் எங்கள்
மகிழ்வுந்தின் மீது
மழைச்சாரல் அடிக்கையில் - இப்போது..!

கானல் தேடல்

அந்தி மழையில்
அங்கமெல்லாம்
நனைந்து - உன்னைத்தேடி
ஓடிவந்தேன் நம் வீட்டினுள்
உன் முந்தானைத்
துவாலையில் - என்
தலை துவட்ட...
கதவைத் திறந்தபோது - தான்
உறைத்தது...
தலைப்பிரசவம் முடித்து
தாய் வீட்டில் - நீ
இருக்கிறாய் என்று!

பயணம்

பணி முடிந்தது
பறக்கிறேன்
கூட்டைத் தேடி...

மத்தள மனம்...

சொந்தங்கள் அழைக்கின்றன
பொறுப்புகள் தடுக்கின்றன
போனால் பரவாயில்லை...
உயிரே கூட!

எண்(ன்) ராசி...

எல்லா 7-ம் எண்
காரர்களைப் போலவே
என் வாழ்வும் இருக்கும்
என நம்பினேன்...
பொய்த்து விடும் போலிருக்கிறது...

துன்பம்

ஏன் எல்லோரும்
என்னைத் துன்புறுத்துகிறீர்கள்?
என்றாய்...
சற்றே சிந்தனை செய்...
உனக்கே புரியும்
உன்னைத் துன்புறுத்துவது
யார் அல்லது எதுவென்பது!